اقترب العام الدراسي على الانتهاء
واقتربنا من موعد الاختبارات النهائية
استعدوا يا اولياء الاموررررر
الله الله بعياالكم
احنا اللى علينا سويناااه والباقى عليكم
بس استغرب من اللجوء الدائم للمدرس الخصوصى مع ان الطالب او الطالبه اذا انتبه للمعلم ماكان راح يحتاج للمدرس الخصوصى ولاعتماد الطالبات على الدروس الخصوصية تلقى الوحده تاخذ راحتها بالسرحان والسوالف ونتعب معاها عشان تركزز بالحصة وكل يوم اقول لهم حكم ومواعظ واذا قلت لهم لازم تنتبهون عشان الامتحان ردت الوحده فيهم وقالت ابلة انا لاااااااااااااااااااازم درس خصوصى ,,...!!!
فاقول لها ليش قالت لانى ما افهم الا بدرس خصوصي ,,
واهنى احط اللوم على الاهل لانهم عودوهم على الشي هذا ,,
اتمنى ان كل طالباتنا وطلابنا يعتمدون على انفسهم فى الدراسه لان اصلاً المناهج مو صعبه
ويبقى القلب فى حسرررة
وشكرااا
كتبها ابلة ثانوى في 07:49 مساءً ::
5 تعليقات
في12,أيار,2008 - 09:16 مساءً, مجهول كتبها ...
حبيبتي الشق عود تلاقينها من المدرسين اللي ما يخافون ربهم والا اولياء الامور اللي
الفكه من عيالهم
بصراحة انا استغرب شلون الواحد يسمع لبنت مراهقه تختلي برجل غريب
خاصه ان اللي يعطون دروس كلهم صغار وبعيد عن تخصصهم دارس تجاره والا محاسبه يدرس رياضيات اوحقوق وشريعه يدرس عربي
والطلاب تعودوا على هالشي وصار نوع من التفاخر ان الوحده تاخذ درس
الله يسامح اخوانا المصريين طول المسلسل عاوزه درس وحاخز درس وفي النهايه
الف مبروك يابنتي جبتي 97
في13,أيار,2008 - 02:12 صباحاً, محمد عبد الله شمس الدين كتبها ...
أنا بييب مدرسين
لأني مسجل منازل
ويا ريت اييب 90 بالميه
او تدرون موافق على الدور الثاني
بس المهم ما ارسب
ههههههه
في13,أيار,2008 - 11:05 صباحاً, ابلة ثانوى كتبها ...
اى نعم الشق عوود
بس لازم بندا من انفسنا ونصحح الاخطاء والله المستعان
اشكركم على المرور
اخوى محمد ,, الله يوفقك والدراسة والشهادة الحين مطلوبه
عاد ننتظر النتيجه :)
في15,أيار,2008 - 09:05 مساءً, انسان ممكن كتبها ...
المشكلة مركبة
ولكن لنفترض ان الدروس الخصوصية ليست سيئة...
هل سيحصل الطلبة على أعلى النتائج؟
انتي أبله وعارفة االإجابة كويس
المشكلة ان الطلبة في حالة غيبوبة تامة
تفرسي في وجوههم اثناء دخولهم إلى المدرسة
لا اعرف كثيرا عن البنات، ولكن من خلال مشاهدتي للطلبة، حالتهم لا تسر على الإطلاق
وغير مشكلة الوعي
فالطالب ينظر إلى الدراسة على انها وسيلة للوظيفة فحسب
بالإضافة إلى سلبيات بعض المدرسين
ففي احد الأيام كنت اسأل احد مدرسين الفيزياء
ما الفرق بين مصطلحي الميكانيكي والديناميكي
عطاني كلام ولكن ما عطاني إجابة!!
وفي احد الأيام كنت اتناول مع احد اساتذة التاريخ (كويتي) الحديث في الشؤون السياسية
وعرجنا على موضوع الماسونية
وقال: هذه شنو الماسونية!
بصراح استحقرت نفسي لمحاورتي مع كائن مثل هذا
انا اختصر وضع المعلمين (بعضهم طبعا :) )
لنقرأ مجلة المعلم ولنرى البؤس الفكري الذي يعانونه.
وخصوصا ذلك البائس الذي يكتب تحت اسم (الفلسفجي)!
يسخر من مادة تدرس للطلبة وبنت الحضارات
بؤس ما بعده بؤس
المشكلة داخل فيها الكل، ولا نستطيع لوم الطالب
فالطالب في مرحلة سلبية او لنقل مرحلة تلقي معلومات، فلا ننتظر منه أن يتأمل او ينتقد أعماله إلا من خلال التربويين بالإضافة إلى الأهل
فهل ربينا أبناءنا على تبني الرؤية النقدية التي تعينهم على بناء المجتمع.
مسؤليتكم وايد كبيرة ايها المعلمين
انتم تبنون مستقبل
الله يعينكم
في16,أيار,2008 - 07:35 مساءً, ابلة ثانوى كتبها ...
والله ان كلامك على العين وعلى الراس
بس على فكرة
بما انى من التربية واعرف شنو اللى ممكن يصير
بصراحه الوزارة والتوجيه ماهمهم مستوى المعلم اقولها وبالبنط العريض
يبووووووون نشاطات شكثر تسوي مطويات شكثر تسوي شغل للمدرسة اهلكووونا بالطلبات
وبالنسبة للمعلم اللى يجهل مادته هذا نترفع عن الكلام عنه احسن
للاسف
اقولها البنات اليومين هذى مو الكل طبعا لا حرام اظلمهم جذى
بس الغالب
همهم اموووور اخرى غير الدراسه بدون تفاصيل على الاقل الحين
واشكرك على المرور والتعليق اخوى
ولى رده على الموضوع حق المدرسين باذن الله